Xornada 3 de Erasmus Days: Novas oportunidades de mobilidade

 O pasado venres celebramos a última xornada dos Erasmus Days no noso colexio cunha serie de charlas informativas sobre as próximas mobilidades europeas nas que poderá participar o noso alumnado.

A nosa xefa de estudos e coordinadora de Programas Europeos foi a encargada de presentar ao alumnado de 1.º e 4.º da ESO as mobilidades previstas no marco dun dos nosos proxectos Erasmus+. Durante as sesións, explicou os destinos, a duración das estadías e os requisitos necesarios para optar a estas oportunidades de aprendizaxe e intercambio internacional.

Ademais, celebrouse outra charla informativa centrada na mobilidade a Grecia, prevista para febreiro de 2027, na que poderán participar tres alumnos ou alumnas de 1.º da ESO. Durante a sesión, presentáronse os principais detalles desta experiencia e as posibilidades de participación.

Con estas actividades puxemos o punto final a unha semana dedicada a achegar Europa á nosa comunidade educativa, dar a coñecer os valores europeos e descubrir as oportunidades que ofrece o programa Erasmus+.

Agardamos que gozásedes destes Erasmus Days e que todas as actividades realizadas vos resultasen interesantes e enriquecedoras.

Animámosvos a seguir atentos ao noso blog Erasmus, onde continuaremos compartindo todas as novidades relacionadas cos nosos proxectos e coas próximas mobilidades europeas.

Xornada 3 de Erasmus Days: Árbore de Valores Europeos

 Na terceira xornada dos Erasmus Days, o alumnado de Educación Infantil e ESO participou nunha actividade creativa e colaborativa para dar vida á nosa Árbore dos Valores Europeos.

Esta árbore tan especial, elaborada a partir das pegadas das súas mans, encheuse de follas de cores con palabras e mensaxes que representan algúns dos valores fundamentais da Unión Europea, como o respecto, a igualdade, a solidariedade, a paz, a liberdade e a convivencia.

A través desta iniciativa, o alumnado tivo a oportunidade de reflexionar sobre a importancia destes valores e de expresar, dun xeito creativo, o que significan para eles.

 A Árbore dos Valores Europeos xa está exposta no vestíbulo do centro. Animámosvos a achegarvos para contemplala e, sobre todo, para descubrir e ler as mensaxes que o noso alumnado pendurou nas súas pólas.

Unha bonita maneira de seguir celebrando os Erasmus Days e de facer visibles os valores que compartimos! 

Xornada 2 de Erasmus Days: Sesión de contacontos en 5 anos

 Continuamos celebrando os Erasmus Days cunha actividade chea de maxia, ilusión e aprendizaxe.

Nesta ocasión, o alumnado da ESO converteuse en contacontos por un día e visitou a aula de 5 anos de Educación Infantil para compartir cos máis pequenos e pequenas a historia da Bela Durminte.

A través deste conto clásico, que forma parte do patrimonio cultural compartido de Europa, descubrimos que as historias viaxan, atravesan fronteiras e unen xeracións e culturas. Os contos tradicionais, presentes en diferentes versións por toda Europa, permítennos coñecer as nosas raíces culturais e valorar tanto aquilo que compartimos como a riqueza da nosa diversidade.

Ademais, esta actividade permitiunos fomentar valores europeos como a solidariedade, a cooperación, o respecto, a empatía e a convivencia, ao tempo que fortalecemos os vínculos entre o alumnado de distintas etapas educativas.

Foi unha experiencia moi enriquecedora, na que os maiores asumiron o papel de narradores e os máis pequenos gozaron da maxia da lectura e da imaxinación.

Porque Europa tamén se constrúe compartindo historias, aprendendo uns dos outros e descubrindo todo aquilo que nos une.

Parabéns aos nosos contacontos pola súa implicación, entusiasmo e ilusión, e grazas por facer desta actividade un momento tan especial!

Xornada 2 de Erasmus Days: Concurso de cartaces

 Na segunda xornada dos Erasmus Days, organizamos un concurso de cartaces dirixido a todo o alumnado da ESO, co obxectivo de fomentar a creatividade e reflexionar sobre os valores que nos unen como cidadáns europeos.

Ao longo desta actividade, os nosos alumnos e alumnas tiveron a oportunidade de deixar voar a súa imaxinación e expresar, a través do debuxo, aquilo que lles inspiran os valores europeos, como a paz, a solidariedade, a igualdade, o respecto, a diversidade cultural e a cooperación.

O resultado foi unha magnífica mostra de talento, orixinalidade e compromiso, na que cada cartel reflectiu unha maneira persoal de entender e representar o espírito europeo.

Parabéns a todos os rapaces e rapazas polo voso fantástico traballo! Grazas pola vosa participación, entusiasmo e creatividade, que contribuíron a facer desta segunda xornada dos Erasmus Days unha experiencia enriquecedora para toda a comunidade educativa.

Xornada 2 de Erasmus Days: Obradoiro sobre a UE en 5 primaria

 Na segunda xornada dos Erasmus Days, o alumnado de 5º de Educación Primaria participou nun divertido e enriquecedor obradoiro de curiosidades sobre a Unión Europea, unha actividade pensada para ampliar os seus coñecementos sobre a cultura, as tradicións e a diversidade dos países que a conforman.

O obradoiro estivo dinamizado e moderado polo alumnado da ESO que forma parte do programa Escolas Embaixadoras do Parlamento Europeo, que asumiu un papel protagonista na organización e no desenvolvemento da actividade, guiando os máis pequenos ao longo das diferentes propostas.

Organizados en grupos, os nenos e nenas tiveron a oportunidade de colaborar, intercambiar ideas e poñer a proba os seus coñecementos, ao tempo que descubrían novos datos e curiosidades sobre os países da Unión Europea. Deste xeito, a aprendizaxe converteuse nunha experiencia participativa, dinámica e divertida.

Esta iniciativa permitiu fomentar o traballo en equipo, a cooperación, o respecto pola diversidade cultural e o sentimento de pertenza a unha Europa plural e unida, valores que forman parte da esencia do programa Erasmus+.

Foi unha experiencia moi positiva na que o alumnado de diferentes etapas educativas compartiu coñecementos e aprendizaxes, demostrando que aprender xuntos é unha excelente maneira de achegarnos á realidade europea.

Xornada 2 de Erasmus Days: Contacontos en infantil

 Comezamos a xornada dos Erasmus Days dedicada ao alumnado cunha actividade moi especial que reuniu a estudantes de diferentes etapas educativas arredor da lectura e dos valores europeos.

O alumnado de 4º da ESO visitou a aula de 4 anos de Educación Infantil para compartir unha fermosa sesión de contacontos. Nesta ocasión, narráronlles a historia No hay color, un precioso conto que nos convida a descubrir a riqueza da diversidade, a valorar as diferentes identidades e a comprender que as nosas diferenzas nos enriquecen.

Esta actividade permitiunos reflexionar sobre a diversidade, o respecto e a inclusión, valores fundamentais da Unión Europea que tamén forman parte da esencia do programa Erasmus+. A través da lectura e do encontro entre alumnado de distintas idades, fomentamos a convivencia, a empatía e a importancia de aprender uns dos outros.

Foi unha experiencia enriquecedora na que os maiores asumiron o papel de narradores e os máis pequenos gozaron dunha historia chea de significado.

Un fermoso xeito de celebrar os Erasmus Days, tendendo pontes entre etapas educativas e lembrando que a diversidade nos une e nos enriquece.