Conexión co Liceo Manzoni de Varese, Italia

 O pasado venres vivimos unha desas experiencias que deixan pegada. O alumnado de francés de 3.º da ESO, acompañado pola súa profesora María José Gil, conectou por videoconferencia co alumnado de español do Liceo Manzoni de Varese (Italia), guiado pola profesora Susana Novoa, quen nos visitara o ano pasado durante a súa estancia de jobshadowing.

Foi unha oportunidade única para fortalecer lazos, aprender xuntos e abrir a aula ao mundo.

Durante a actividade, os rapaces e rapazas compararon e analizaron dous poemas: un de Rosalía de Castro e outro de Alessandro Manzoni, descubrindo coincidencias, influencias e emocións compartidas entre ambas culturas. Ademais, debatemos sobre a emigración, o concepto tan galego de morriña e intercambiamos preguntas sobre a vida e a realidade cotiá en España e en Italia.

O encontro foi tan especial que mesmo a televisión italiana asistiu para recoller o momento, deixando constancia desta experiencia tan enriquecedora.

Unha xornada memorable que o alumnado viviu con enorme ilusión e que foi posible grazas aos vínculos creados a través do programa Erasmus+. Seguiremos tecendo pontes e creando oportunidades para que o noso alumnado medre, aprenda e soñe máis alá das fronteiras.

Obradoiro sobre emocións en inglés

 Despois da súa recente mobilidade Erasmus+ en Dublín, María José Gil quixo trasladar ao alumnado de 2º ESO parte da esencia da cidade e das metodoloxías observadas durante a súa estancia. Para iso, levou a cabo unha actividade centrada no team work e na aprendizaxe emocional a través do inglés.

O alumnado, organizado por grupos, traballou con panfletos informativos e mapas de Dublín para planificar a súa propia viaxe. Cada equipo debía decidir que lugares visitar, que monumentos coñecer, que actividades realizar e o presuposto necesario para levala a cabo. Este proceso permitiulles afondar na xeografía, a cultura e os espazos máis emblemáticos da capital irlandesa.

A actividade culminou cun exercicio de reflexión no que cada grupo compartiu como se sentiría realizando esa viaxe en solitario, favorecendo así a empatía, a conexión emocional co resto da clase e o autocoñecemento. Deste modo, combinouse a aprendizaxe lingüística coa educación emocional dun xeito natural e significativo.

Foi unha experiencia moi enriquecedora que ampliou a visión do alumnado sobre o mundo e sobre si mesmos, ao tempo que reforzou as súas competencias en inglés.

Día 5 e último da mobilidade en Dublín

 No seu último día en Dublín, María José Gil viviu unha xornada chea de aprendizaxes e experiencias significativas dentro da súa mobilidade Erasmus. A mañá comezou con actividades dinámicas que implicaban movemento e interacción, pensadas para favorecer a creación de vínculos, fortalecer a confianza e mellorar o clima de grupo.

Ao longo do día, profundizou en como integrar a educación socioemocional nas distintas materias, empregando tanto recursos analóxicos como ferramentas dixitais. Tamén participou na creación dun lesson plan en grupo, no que se deseñou unha actividade centrada na integración das competencias emocionais seguindo o modelo SEL proposto por CASEL.

Antes de finalizar o curso, realizou unha síntese dos contidos máis relevantes traballados durante a semana, reflexionando sobre como aplicalos na práctica docente. A continuación, tivo lugar a entrega de certificados, un momento especial que puxo o broche final á formación.

Para completar a xornada, disfrutou dunha visita cultural ao Castelo de Malahide, un enclave histórico de gran beleza que lle permitiu despedirse de Dublín dun modo especialmente enriquecedor.

Día 3 da mobilidade en Dublín

 O terceiro día da mobilidade Erasmus+ de María José Gil en Dublín estivo marcado por unha intensa aprendizaxe arredor da prevención do bullying e a resolución de conflitos, así como por un enriquecedor achegamento á cultura irlandesa.

Ao longo da mañá, o grupo afondou no concepto de aprendizaxe social e emocional, analizando que é, por que resulta fundamental no desenvolvemento integral do alumnado e como pode incorporarse de maneira natural e motivadora na aula. Reflexionaron sobre a importancia de traballar as emocións para mellorar a convivencia, aumentar a motivación e favorecer ambientes educativos seguros e positivos.

Outro dos contidos centrais da xornada foi o estudo das preferencias xunguianas de Carl Jung. A través desta análise, comprendéronse mellor as características de personalidade do alumnado e como estas poden influír nos seus procesos de aprendizaxe. Isto permitiulles valorar novas formas de adaptar a práctica docente para atender a diversidade existente nas aulas.

A sesión tamén incluíu unha parte innovadora na que se explorou o uso da intelixencia artificial para integrar o aprendizaxe emocional no currículo e nos lesson plans. As ferramentas de IA demostraron ser un apoio útil para deseñar actividades personalizadas e coherentes cos obxectivos emocionais que se queren traballar.

Para completar a parte formativa, o grupo participou nunha actividade vivencial baseada na técnica Fishbowl, que permitiu experimentar de forma directa dinámicas de escoita activa, empatía e reflexión compartida. Ademais, profundizaron nos cinco piares que sustentan a educación social e emocional como base esencial para a prevención de conflitos dentro da escola. 

Pola tarde, a experiencia continuou con unha divertida clase de baile irlandés, onde aprenderon pasos básicos e gozaron dun achegamento lúdico á tradición musical do país. A xornada rematou cun percorrido cultural que incluíu a visita ao Dublin Castle, á Saint Patrick’s Cathedral e ao Dublinia Museum, explorando así a historia viquinga e medieval da cidade.

Foi un día completo, diverso e profundamente enriquecedor para María José Gil e o resto do grupo, que continúa avanzando nesta mobilidade Erasmus+ con aprendizaxes significativas tanto a nivel profesional como persoal.

Día 2 da mobilidade en Dublín

 O segundo día da mobilidade Erasmus de María José Gil en Dublín estivo centrado no autocoñecemento, a xestión emocional e a resolución positiva de conflitos, combinando aprendizaxe práctica con momentos de enriquecemento cultural.

Comezou coa actividade “Remember me”, unha dinámica pensada para que o alumnado poida coñecerse mellor, desenvolver habilidades sociais e aprender a comunicarse de maneira efectiva, mantendo o autocontrol nas interaccións cotiás.

A continuación, afondouse no concepto de conflito: que é, como se define e por que é fundamental entendelo correctamente para poder detectalo e analizalo. Reflexionamos tamén sobre o ciclo das emocións, identificando como se enlazan co nacemento e coa evolución dun conflito.

Outro dos puntos clave da sesión foi a identificación de estratexias para previr e manexar conflitos. Hoxe centrámonos especialmente na escoita empática, traballando os pasos necesarios para realizala con eficacia e mellorar así a calidade da comunicación.

Completo y a formación cunha serie de tips para desenvolver unha comunicación non violenta, facilitando ferramentas prácticas aplicables tanto no ámbito educativo como na vida persoal.

Para pechar o día, gozou dunha visita cultural ao porto pesqueiro de Howth e aos seus espectaculares acantilados, un espazo perfecto para continuar aprendendo nun contorno diferente e inspirador.

Un día cheo de aprendizaxes significativas e experiencias que seguirán enriquecendo esta mobilidade Erasmus en Dublín.

Día 1 da mobilidade en Dublín

 María José Gil iniciou hoxe a súa experiencia Erasmus+ na Europass Teacher Academy, onde participa no curso de xestión de conflitos e prevención do bullying. O seu primeiro día estivo cheo de actividades, aprendizaxes e un primeiro achegamento á cultura irlandesa.

Rompendo o xeo entre profesionais europeos

A xornada comezou con varias ice breaking activities que axudaron a crear un ambiente próximo entre o profesorado participante, procedente de diferentes países. Estas dinámicas facilitaron que todas e todos empezasen a coñecerse e a traballar con maior confianza desde o primeiro momento.

Unha ollada á xeografía e á cultura de Irlanda

A continuación, o grupo realizou unha breve introdución á xeografía e á cultura irlandesa. 

Esta aproximación permitiu contextualizar o entorno no que se desenvolverá a formación e comprender mellor algunhas características culturais que poden influír na xestión de conflitos.

A mañá continuou cunha explicación sobre os diferentes tipos de pensamento, un aspecto esencial para analizar como se afrontan e comprenden os conflitos desde perfís diversos. Despois, as e os participantes levaron a cabo unha actividade grupal de visual thinking, na que elaboraron unha representación gráfica que posteriormente expuxeron ao resto do grupo. María José destacou a riqueza de perspectivas achegadas por cada equipo.

Pola tarde, María José gozou dun walking tour guiado por Dublín. O percorrido incluíu lugares emblemáticos como Temple Bar, a estatua de Molly Malone ou a figura de Óscar Wilde, entre outros espazos cheos de historia. Foi unha oportunidade perfecta para afondar na cultura local e completar a xornada de aprendizaxe cun toque máis vivencial.

Este primeiro día supuxo para María José Gil unha benvida inspiradora á súa mobilidade Erasmus+, marcada pola descuberta, o intercambio e a ilusión por seguir formándose.
¡Mañá continuará a aventura!