As nosas profesoras Chus Corral e Isabel Cachaldora finalizaron a súa mobilidade Erasmus+ en Ámsterdam, onde participaron durante esta semana nun curso sobre prevención e resolución de conflitos na aula, organizado pola Europass Teacher Academy.
Durante esta última xornada de formación, abordaron diferentes metodoloxías e ferramentas educativas orientadas á mellora dos procesos de ensino e aprendizaxe.
Entre os contidos traballados destacou o DUA (Deseño Universal para a Aprendizaxe), que promove unha educación inclusiva e adaptada á diversidade do alumnado, así como o TDL (Teaching for Deep Learning), centrado no desenvolvemento dunha aprendizaxe profunda, significativa e reflexiva.
Tamén afondaron na taxonomía de Bloom, unha ferramenta que permite organizar os obxectivos de aprendizaxe segundo diferentes niveis de complexidade cognitiva, e analizaron as diferenzas entre a aula tradicional e a aula do século XXI, reflexionando sobre a importancia de incorporar metodoloxías máis activas, participativas e centradas no alumnado.
A xornada concluíu coa entrega dos certificados de participación, poñendo o broche final a unha enriquecedora semana de formación e intercambio de experiencias con docentes doutros países europeos.
Esta mobilidade Erasmus+ supuxo unha excelente oportunidade para adquirir novos coñecementos, compartir boas prácticas educativas e descubrir estratexias que contribuirán a seguir impulsando a innovación educativa, a inclusión e a mellora da convivencia no noso centro.
Desde o colexio, felicitamos as nosas profesoras pola súa participación e polo seu compromiso coa formación continua e a internacionalización da nosa comunidade educativa.
Ningún comentario:
Publicar un comentario